არქიმანდრიტი გიორგი (გურჩიანი):
-თითოეულ ადამიანს აქვს სურვილი, ღმერთი ადიდოს, მას ემსახუროს და ერის კეთილდღეობაში სასიკეთო წვლილი შეიტანოს.. არიან ასევე ისეთი ადამიანები, რომლებიც მოწოდებულნი არიან სასულიერო წოდებისათვის. ღმერთი აძლევს ადამიანს კეთილი საქმის გაკეთების სურვილს. ადამიანი თანხმდება ღვთის ნებას და ხდება სინერგია, შეთანხმება ღვთისა და ადამიანის ნებისა. სასულიერო ხარისხი იმდენად დიდ პასუხისმგებლობას მოითხოვს, რომ ვერცკი წარმოვიდგენდი.

ნათქვამია: „პატივსა ვხედავ და პატიჟისაგან მეშინისო“. იმდენად დიდია პატივი, რომ ამ პატივის ტარება საპასუხისმგებლოა.ადამიანი, როდესაც სულიერი მოძღვრის არჩევას დააპირებს პირველ რიგში ყურადღება უნდა მიაქციოს მოძღვრის სულიერ მდგომარეობას. არის თუ არა ეს ადამიანი ის პიროვნება, რომელიც მის სულიერ გზას, მის სულს უწინამძღვრებს და ღმერთთან მიიყვანს, ღმერთთან დაამკვიდრებს. ადამიანი ჯერ საკუთარ თავში უნდა გაერკვიოს და მერე დაიწყოს სულიერი მოძღვრის ძებნა.. მაშინ არჩევანს აკეთებს. ხშირად იმედის გაცრუებაც ხდება. ან მოძღვარი არის ამის მიზეზი ან თვითონ ადამიანი.

მთავარია თავად ადამიანი ცხოვრობდეს სწორად და ღმერთი იმ მღვდელის დახმარებით მისცემს ადამიანს ყველაფერს რაც მას სულის ცხონებისთვის სჭირდება. შეიძლება ყველა მოძღვარს არ ჰქონდეს განათლება, მაღალი ზნეობრივი სულიერი მდგომარეობა. მაგალითად, ყველა ბავშვის მშობელი ხომ არ არის ისეთი როგორიც შვილს სურს, მაგრამ ეს იმას არ ნიშნავს, რომ პატივს არ სცემს მშობელს. უფლის მცნება მშობლის პატივისცემას გვავალდებულებს. უმჯობესია, პირველ რიგში ჩვენში გავარკვიოთ რა გვინდა და შემდეგ რას ვითხოვთ სხვისგან. სულიერი მოძღვრის არჩევა, მითუმეტეს დღეს ადვილი როდია. თუმცა, შეიძლება ყოველთვის ასე იყო. ღმერთი უცვლელია და ის პირობა რაც ღმერთმა მოგვცა ის დღესაც და უკუნისამდე სრულყოფილად მომავალშიც გაგრძელდება.

მთავარია ადამიანს უნდოდეს ცხონება. ნთქვამია, შენ თუ კარგი ხარ, მაშინ შენს ირგვლივ ყველა კარგი იქნება. თუ ადამიანს ცხონება არ სურს, არათუ მღვდელი, თვით ღმერთიც ვერ აცხოვნებს. სიტყვა-ვერ ღვთის უძლურებაზე არ მეტყველებს. ღმერთი ძალით არ აცხოვნებს ადამიანს. ღმერთი არ აძალებს ადამიანს. თუ ადამიანს ცხონება სურს, ყველანაირად შეეწყობა ხელი ღვთისგანაც და ადამიანებისგანაც. ერთ რჩევას ყველას მივცემ, რომ მოძღვრის ამორჩევაში ძალიან დიდი ყურადღება გამოიჩინონ, რათა მერე არ მოხდეს იმედის გაცრუება. ყურადღებით უნდა ამოირჩიოს სულიერი მამა მოძღვარი, რომელიც ადამიანს როგორც მამა-შვილს ისე ატარებს ამ წუთისოფლის განსაცდელიან ვიწრო გზაზე და ღმერთამდე მიიყვანს. მოძღვრის მოვალეობაა ადამიანს დაანახოს ღმერთი, დააყენოს და განამტკიცოს ცხონების გზაზე.