წმინდა ნინიანი წარმოშობით ბრიტი (ბრიტები - ბრიტანეთის კუნძულების ძირძველი მოსახლეობა) იყო და V საუკუნეში ცხოვრობდა. მან გოლუეში დააარსა კანდიდა კასას (უითჰორნი) მონასტერი (კანდიდა კასა ლათინურად "თეთრ ქვას" ნიშნავს, ხოლო ინგლისელები უითჰორნს, ანუ "თეთრ რქას" ეძახდნენ), მას პირველად იხსენიებს ღირსი ბედა (+735). იგი ამბობს, რომ წმინდა ნინიანმა სამხრეთი პიქტები (პიქტები შოტლანდიის ძირძველი მოსახლეობა) განანათლა და პიქტების მოციქულად იწოდება. ღირსი ბედას მიხედვით წმინდა ნინიანს რომში შეუსწავლია ჭეშმარიტი სარწმუნოება და მისი საიდუმლოებები. მისი ეპისკოპოსობის დროს აიგო წმინდა მარტინის სახელობის ტაძარი, სადაც თვით იგი და სხვა წმინდანებია დაკრძალული. თანამედროვე ისტორიკოსი ვიქტორ ზასლავსკი წერს, რომ იგი იყო რომისადმი ლოიალურად განწყობილი ერთ-ერთი ბრიტანელი მეფის შვილი და ბავშვობიდან დიდი ღვთისმოშიშებით გამოირჩეოდა. ის სასწავლებლად რომში გაემართა, სადაც კარგი განათლება მიიღო. შემდეგ გალიაში წავიდა და წმინდა მარტინ ტურელს დაემოწაფა. შემდეგ დაბრუნდა სამშობლოში და ბრიტანეთის ჩრდილოეთით კალედონიაში გაემგზავრა, სადაც წარმართი პიქტები ცხოვრობდნენ. აქ მან ააგო "კანდიდა კასად" წოდებული ქვის ეკლესია, რომელმაც როსნატის დიდ მონასტერს დაუდო სათავე. დანარჩენი ცხოვრება წმინდა ნინიანისა აღსავსეა ლეგენდებით და სასწაულებით. თუმცა რეალურად კალედონიის-შოტლანდიის ქრისტიანიზაცია ორი საუკუნის მერე კელტი მისიონერობის გაფურჩქვნის ხანაში მოხდა.

წმინდა ნინიანი იყო უდიდესი ასკეტი, ხშირად განმარტოვდებოდა ხოლმე მღვიმეში, სადაც დიდხანს ლოცულობდა. შესაძლოა ის შოტლანდიაში გალოუეს პირველი ეპისკოპოსი იყო. როგორც ვთქვით, წმინდანმა სიცოცხლეში მრავალი სასწაული მოახდინა. მისი გარდაცვალების დროს, დაახლოებით 432 წელს, მონასტრის ზარები თავისით დაირეკა. რომელმაც ყველას აუწყა მისი გარდაცვალება, და სავანის ძმები მის სასთუმალთან შეკრიბა. ის მის მიერვე აშენებულ დიდებულ ტაძარში, ტრაპეზის გვერდით ქვის კუბოში დაკრძალეს. მას ახლაც დიდ პატივს მიაგებენ, მართლმადიდებელი ქრისტიანები და კათოლიკეები.