წმინდა მალო დაიბადა V საუკუნის ბოლოს, ბრეტანში, ან სამხრეთ-დასავლეთ საფრანგეთში. მისმა ღვთისმოსავმა მშობლებმა შვილი წმინდა სამსონს მიაბარეს აღსაზრდელად, რომელიც ინგლისში იღუმენი გახდა, მაგრამ მოგვიანებით დაბრუნდა ბრეტანში და ეპისკოპოსი გახდა თავისი დოლის მონასტერში, რომელიც დღევანდელი სენ მალოს სამხრეთით მდებარეობს. მისი დიდებული ხელმძღვანელობით ჭაბუკმა მალომ დიდ წარმატებებს მიაღწია სხვადასხვა მეცნერებების შესწავლაში და ღვთისმოსაობაშიც წარემატა.

მღვდლად კურთხევის შემდეგ წმინდა მალო ლანმიურის იღუმენად დაადგინეს და მას ორმოცდათორმეტი წელი მართავდა. როცა წმინდა სამსონი გარდაიცვალა, წმინდა მალო დოლის მონასტრის იღუმენად აირჩიეს. თუმცა იქ მხოლოდ ორი-სამი წელი დარჩა. უკვე სამოცდაათ წელს იყო გადაცილებული, როცა ძმების თანხმობით უდაბნოში განმარტოვდა, სადაც თავისთვის კელია აიშენა. თუმცა მარტოობა ვინ აცალა, უამრავი ადამიანი მიდიოდა მასთან სულისა და სხეულის განკურნების მსურველნი. წმინდანის ლოცვით ერთი მდიდარი კაცი კეთრისაგან განიკურნა, რომელიც მას შვიდი წელი ტანჯავდა. მადლიერმა კაცმა წმინდანს ჯერსის კუნძული აჩუქა. იქ წმინდა მალომ ახალი მონასტერი აიშენა და 62 მონაზონთან ერთად ემსახურებოდა უფალს და მათ ხელში დალია კიდეც სული რამდენიმე წლის შემდეგ. უფლის ანგელოზის ხელით ის ტაძარში უფლის სისხლსა და ხორცს ეზიარა.

სიკვდილის შემდეგ ამავე ტაძარში დაკრძალეს. წმინდა მალოს საფლავზე უამრავი დიდებული სასწაული აღესრულა.
.....................................

ამავე დღეს ეკლესიაში იხსენიება:

წმინდა კინტიანე, სელევკიის ეპისკოპოსი (IV)

წმინდა კინტიანე სხვა 318 მამასთან ერთად მართლმადიდებლურ რწმენას იცავდა ეკლესიის პირველ მსოფლიო კრებაზე, 325 წელს. მას მოიხსენიებს ბიზანტიური სვინაქსარი.

.......................................

წმინდა არნულფ ტულელი ეპისკოპოსი (+871)

მას მოიხსენიებს დასავლეთის ეკლესია.
................................

წმინდა სეკუნდი, ფიდენტიანე და ვარიკუსი

ეს აფრიკელი მოწამენი ქრისტესთვის ეწამნენ იპონში (დღევანდელი ბონი). მათ იხსენიებს იერონიმეს მარტიროლოგია.