ძლისპირი: უგალობდეთ უფალსა, რომელმან განიყვანა ერი თვისი ზღვასა მას მეწამულსა. მას მხოლოსა უგალობთ, რომელიცა დიდებულ არს.

გალობად და ქებად, მაცხოვარო ჩემო, მონა ესე შენი ღირსად გამომაჩინე უხორცოსა მის ანგელოზისა, წინამძღვარისა და მცველისა ჩემისა.

შემიწყალე მე, რამეთუ მხოლო უდებებით და უგულისხმოებით მდებარე ვარ, წინამძღვარო ჩემო, მცველო ანგელოსო, ნუ დამიტევებ მე წარწყმედილსა.


გონებაი ჩემი წარმართე ვედრებითა შენითა, ყოფად ბრძანებათა ღვთისათა, რათა მივემთხვიო მისგან მოტევებასა ცოდვათასა, და მოძულებად ძვირთა წარმიძეღუ, გევედრები შენ.


ევედრე, ქალწულო, ჩემ, მონისა შენისათვის, სახიერსა ღმერთსა, მცველისა მის ჩემისა თანა და მიძღოდე მე ყოფად მცნებათა ძისა შენისათა.


ძლისპირი: შენ ხარ დამამტკიცებელი მვედრებელთა შენთა, ქრისტე, შენ ხარ ნათელი დაბნელებულთა, და გადიდებს სული ჩემი.

ყოველი გონებაი ჩემი და სული შენდამი დამიძს, მცველო ჩემო ანგელოსო, და ყოვლისაგან განსაცდელისა მტერთასა განვერები.

მაჭირვებს მე მტერი და მსწავლის მარადის ყოფად თვისისა ნებისა, არამედ შენ, წინამძღვარო ჩემო, ნუ დამიტევებ მე წარწყმედილსა.

ღირს-მყავ მე შესხმად ქებისა ღვთისა და შენ, მცველისა ჩემისა ანგელოსისა; და გამომიხსენ მე მტერთაგან, ჭირვეული ესე.

განჰკურნე, ყოვლადწმიდაო, ფრიად სნეული ესე სული ჩემი და სულიერნი იგი მტერნი ჩემნი იოტენ, რომელნი ეგე მარადის მბრძვანან.


სულიერითა მით სურვილითა გიგალობ შენ, მცველო სულისა ჩემისაო წმიდაო ანგელოსო: დამიცევ და დამიფარე საფრთხეთაგან ბოროტთა, და ცხოვრებისა მიმართ წარმართებად გულისხმა-მიყავ, და განმწმიდე და განმაძლიერე მე.


ღვთისმშობელო სძალო, ყოვლადუთესლოდ მშობელო ყოველთა მეუფისაო, მას ევედრე ანგელოსისა ჩემისა მცველისა თანა, რათა გამომიხსნეს მე ყოვლისაგანვე უგულისხმოებისა და მოსცეს ლმობიერებაი და ნათელი სულსა ჩემსა, და მოტევებაი მომმადლოს, რამეთუ შენ მხოლო ხარ მსწრაფლშემწე.

ძლისპირი: მესმა, უფალო, განგება საიდუმლოთა შენთა გამოუთქმელთა, განიცადენ საქმენი შენნი და აღვიარე მე ღვთაება შენი.

ევედრე კაცთმოყვარესა ღმერთსა, მცველო ჩემო, და ნუ დამიტევებ, არამედ ცხოვრებაი ჩემი მშვიდობით დაიცევ და მომეც მე ცხოვრება უძლეველი.

შემწედ და მცველად ცხოვრებისა მომიგიე შენ ღვთისა მიერ, ანგელოსო, და გევედრები შენ, წმიდაო, ყოველთა ჭირთაგან თავისუფალ-მყავ.


მწიკულევანება ესე ჩემი სიწმიდითა შენითა წმიდა-ჰყავ, მცველო ჩემო, რათა ნაწილსა მარცხენასა განვერე მე ვედრებითა შენითა.


უმეცარ ვიქმენ მე ფრიად გარემოდგომილთა ძვირთაგან, ყოვლადწმიდაო ქალწულო, არამედ მსწრაფლ მიხსენ, რამეთუ შენდა მხოლოსა მოვივლტი.

ძლისპირი: აღმსთობილნი შენ გიგალობთ, უფალო, გვაცხოვნენ ჩვენ, ვითარცა სახიერ ხარ, რამეთუ სხვა ღმერთი არა ვიცით.

გაქვს შენ კადნიერება ღვთისა მიმართ, მცველო ჩემო წმიდაო, და ევედრე მას, რათა მიხსნეს ჭირთაგან და მაცხოვნოს მე.

ნათელო ნათლისაო, ნათლად გამოაბრწყინვე სული ჩემი, წინამძღვარო და მცველო ჩემო, ღვთისა მიერ მოცემულო.


ძილსაცა შინა დამიცევ მე, ანგელოსო ღვთისაო, ვითარცა რა მღვიძარე, და აღმადგინე ვედრებად შენდა.


მარიამ ღვთისმშობელო, სასოო მორწმუნეთაო, მტერთა სილაღე დაამხვე და შემსხმელნი შენნი მხიარულ-ჰყვენ.


ძლისპირი: მომეც მე სამოსელი ბრწყინვალე, რომელმან შეიმოსე ნათელი სამოსელად, ღმერთო, მეოხებითა მოწამეთათა.

ყოველთავე განსაცდელთა მიერ განმათავისუფლე მე და ზრუნვისაგან მიხსენ, გევედრები შენ, წმიდაო ანგელოსო, და დამამტკიცე გონიერებასა ზედა კეთილსა.

წმიდა-ჰყავ გონებაი ჩემი, ნეტარო, და განმანათლე მე, გევედრები შენ, წმიდაო ანგელოსო, და ცნობა ჩემი ყოვლადვე უმჯობესისა მიმართ წარმართე.


განარინე გული ჩემი ბოროტთაგან აღძვრათა გულის-თქმისათა და მღვიძარებად განმაძლიერე მე კეთილთა შინა, მცველო ჩემო, და მიმიძეღუ მყუდროსა ცხოვრებისა მიმართ.


სიტყვა ღვთისა დაემკვიდრა შენ შორის, ღვთისმშობელო დედოფალო, და გიჩინა შენ კაცთათვის ზეცისა კიბედ, რამეთუ შენ მიერ გარდამოხდა მაღლით ჩვენდა მომართ.


გამომიცხადე მე მოწყალებაი შენი, წმიდაო ანგელოსო ღვთისაო, მცველო ჩემო, და ნუ განმეშორები მე, მწიკულევანსა ამას. არამედ განმანათლე მე ნათლითა მიუახლებელითა და მყავ ღირს ზეცისა სასუფეველისა.


შეურაცხი ესე სული ჩემი მრავლითა მით ცთუნებითა, წმიდაო წინამდგომელო, ღირს-ჰყავ გამოუთქმელისა მის ზეცისა დიდებისა, გალობად გუნდსა თანა უხორცოთა ძალთასა, და შემიწყალე მე, და დამიცევ გონებითა მით კეთილითა, და სული ჩემი განანათლე, ანგელოსო ჩემო, რათა დიდებითა მით შენითა განვმდიდრდე, და უკუნ-აქციე მტერი იგი, რომელი აზმნობს ჩემდა მომართ ძვირსა და ღირს-მყავ მე ზეცისა სუფევასა.


ძლისპირი: ყრმათა ღვთისმსახურთა ბაბილონს შინა არა მსახურეს ხატსა ოქროისასა და მით სახმილსა შეითხივნეს და შეცვრეულნი ესრეთ ღაღადებდეს და იტყოდეს: კურთხეულ ხარ შენ, უფალო, ღმერთო მამათა ჩვენთაო.

მოწყალე მექმენ და ევედრე უფალსა, ღვთისა ანგელოსო ჩემო, რამეთუ მაქუ შენ ყოველთა ცხოვრებასა ჩემსა წინამძღვრად და მცველად, ღვთისა მიერ მოცემულო ჩემდა უკუნისამდე.

ნუ დაუტეობ გზასა შინა სლვად სულსა ჩემსა უბადრუკსა, რათა არა მოიკლას ავაზაკთა მიერ, წმიდაო ანგელოსო, რამეთუ შენ მოცემულ ხარ ღვთისა მიერ მცველად, არამედ წარუძეღუ მას გზასა სინანულისასა.


ყოვლითურთ ისწრაფვის სული ჩემი სირცხვილეული მიყვანებად ბოროტთა ზედა გონებისა ჩემისა; არამედ უსწრვე, წინამძღვარო ჩემო, და მომეც კურნებაი და გონებაი კეთილი, რათა მივიდრიკო ყოვლადვე სიმართლისა მას გზასა.


სიბრძნით აღავსე ყოველივე და ძლიერებითა ღვთაებისათა, გვამოვანისა მაღლისა სიბრძნეო, გულისხმის-ყოფით ღვთისმშობლისა მიერ სარწმუნოებით ვხმობთ: მამათა ჩვენთა ღმერთო, კურთხეულ ხარ შენ.


ძლისპირი: მეუფესა ცათასა, რომელსა მსახურებენ გუნდნი ანგელოსთანი, უგალობდით და აღამაღლებდით მას უკუნისამდე.

ღვთისა მიერ მოვლინებულო ყოვლდასახიერო ანგელოსო, დაამტკიცე ცხოვრებაი ჩემი, მონისა შენისა, და ნუ დამიტევებ მე უკუნისამდე.

ანგელოსო სახიერო, სულისა ჩემისა წინამძღვარო და მცველო, ყოვლადსანატრელო, გიგალობთ შენ უკუნისამდე.


მეყავ მე მფარველ დღესა მას განკითხვისასა ყოველთა კაცთასა, რომელსა შინა ცეცხლითა გამოიცდებიან საქმენი კეთილნი და ბოროტნი.


მეყავ მე შემწე მყუდრო, ღვთისმშობელო, მარადის ქალწულო, მონასა შენსა და ნუ მყოფ დაკლებულ სასუფეველისაგან.


ძლისპირი: ჭეშმარიტად ღვთისმშობლად აღგიარებთ, რომელნი შენ მიერ ვიხსნენით, ქალწულო უბიწოო, და გუნდსა თანა უხორცოთასა შენ დაუცხრომელად გადიდებით.

იესო, შემიწყალე მე, მხოლოო მაცხოვარო ჩემო, და მართალთა მათ კრებულისა თანა ღირს-მყავ მე თანა-ზიარებად, რათა გადიდებდე.

გონებითა ჩემითა მარადის-ყოფაი კეთილისა მის და სარგებელისა მომანიჭე, წმიდაო ანგელოსო, და უძლურებასა შინა ძლიერად გამომაჩინე და უბიწოდ.


რამეთუ გაქვს კადნიერებაი მეუფისა მიმართ ზეცათასა, მას ევედრე, სხვათა მათ უხორცოთა თანა, შეწევნად ჩემდა უბადრუკისა.


დიდი კადნიერება გაქვს შენგან შობილისა მიმართ, ქალწულო, მე, შეკრული ცოდვითა, განმხსენ და მომეც შეწევნაი შენი, რათა გიგალობდე.


წმიდაო ანგელოსო, უბადრუკისა სულისა ჩემისა და ვნებულისა ცხოვრებისა ჩემისა შემწეო, ნუ დამაგდებ მე ცოდვილსა, ნუმცა განმეშორები მე უძღებებისა ჩემისათვის, ნუ აცლი ბოროტსა ეშმაკსა, რათა დამიპყრას მე მოძულეობითა მოკვდავისა ამის ხორცისათა. განაძლიერე საწყალობელი და უძლური სული ჩემი და მასწავე მე გზაი ცხოვრებისა. ჰოი, ანგელოსო წმიდაო, მომეც მე სინანული პეტრესი, ცრემლნი მაგდალინელისაი, აღსარებაი ავაზაკისა მის ჯვარცმულისა, მომიტევენ ცოდვანი ჩემნი აქამომდე ქმნილნი. ჰოი, წმიდაო ანგელოსო ღვთისაო, მცველო და მფარველო უნდოისა სულისა და ხორცისა ჩემისაო, მომიტევე მე ყოველივე, რაოდენთა მიერ განგარისხე და მწუხარე-გყავ ყოველთა დღეთა ცოხვრებისა ჩემისათა. და უკეთუ რაიმე შეგცოდე დღეინდელსა ამას დღესა, დამიფარე აწინდელსა ამა ღამესა და მიხსენ მე ყოვლისაგან განსაცდელისა წინააღმდგომისა, რათა არცა ერთითა რაითამე ცოდვითა განვარისხო ღმერთი, და ევედრე ჩემთვის უფალსა, რათა განმამტკიცოს მე შიშსა შინა თვისსა და გამომაჩინოს მე მონად ღირსად მადლისა მისისა. ამინ.