მსგავსი სულიერების კერა ჩვენს ქვეყანაში იშვიათად თუ მინახავს. ამ ადგილს "კალამონი" ეწოდა, რადგან წმინდა თეკლა ანტიოქიაში, კალამონის მთაზე მოღვაწეობდა. წმინდა თეკლას დედათა მონასტრის წინამძღვარია იღუმენია თეკლა. ხოლო მოძღვარი და წმინდა იოვანე ნათლისმცემლის შობის მამათა მონასტრის სახელობის წინამძღვარი, †იღუმენი იოვანე (ჩაჩიბაია).

იღუმენი იოვანე გვიამბობს:

-1995 წელს მივიღეთ უწმიდესისა და უნეტარესის, სრულიად საქართველოს კათოლიკოს-პატრიარქის - ილია II-ის ლოცვა-კურთხევა, დაგვეარსებინა მონასტერი, რომლის მფარველად ავირჩიეთ წმინდა პირველმოწამე თეკლა. მონასტრისთვის შერჩეული იქნა ადგილი მცხეთის რაიონში, სოფელ ბევრეთში. საკუთარი ხარჯებით შევიძინეთ ნაკვეთი, რომელშიც რამდენიმე ნაგებობა იდგა. მონასტერი აშენდა ჩვენი პირადი სახსრებით, ჩვენი შრომით და ღვთისმოყვარე საერო პირების დახმარებით. საცხოვრებელი ნაგებობის არქიტექტურა მრავალფეროვანია და ერთი შეხედვით, უცხო შთაბეჭდილებას ტოვებს, რადგან ჩვენი ქვეყნის ძნელბედობის გამო, ძველი სამონასტრო ნაგებობების ნიმუშები ფაქტიურად არ არსებობს. ნაგებობის გეგმის შედგენის დროს გამოვიყენეთ საქართველოს სხვადასხვა კუთხის: მთათუშეთის, ფშავ-ხევსურეთის, სვანეთის, დიდგორის მთიანეთის, რაჭის და ასევე ჩვენი ხალხის ცხოვრების სხვადასხვა პერიოდისთვის დამახასიათებელი ეროვნული არქიტექტურული სტილი. აგრეთვე საქართველოს ეკლესია-მონასტრებისა და ციხე-სიმაგრეების. ასევე გავითვალისწინეთ ათონის წმიდა მთის მონასტრების, იერუსალიმის ჯვრის მონასტრის, მაცხოვრის საფლავის ეკლესიის და პეტრიწონის ქართველთა მონასტრის არქიტექტურული სტილიც. ნაგებობა გადახურულია იმერული კრამიტით და ანანურის ქვით. ეს ქვა აქაური მკაცრი კლიმატისთვის ყველაზე უფრო შესაფერისია.



ყოვლადწმიდა ღვთისმშობლისადმი განსაკუთრებული სიყვარულისა და სასოების ნიშნად, უწმიდესის კურთხევით, ავაშენეთ ყოვლაწმიდა ღვთისმშობლის მიძინების ტაძარი, რომელსაც საფუძვლად დაედო საქართველოს X-XI საუკუნეების ეკლესიათა არქიტექტურული სტილი და კერძოდ, კვეტერის ეკლესიის არქიტექტურა. ტაძარი, კვეტერის ეკლესიის მსგავსად, აშენებულია სტალაგმიტური კლდის ქვით, შირიმით. ღმრთისმშობლის მიძინების ტაძარში მდებარეობს ორი ეკვდერი - წმინდა პირველმოწამე თეკლასი და წმინდა იოვანე ნათლისმცემლის სახელობისა, რადგან ჩვენ ვთვლით, რომ ეს წმინდანები ჩვენი განსაკუთრებული მეოხნი და მფარველნი არიან. წმინდა თეკლას სახელობისაა დედათა მონასტერი, ხოლო წმინდა იოვანე ნათლისმცემლის შობის სახელს ატარებს მამათა მონასტერი, რომელიც უწმიდესის კურთხევით დაარსდა მცხეთის რაიონში, სოფელ წოდორეთის მახლობლად, 2009 წელს და რომელშიც ოთხი მონაზონი ვცხოვრობთ. წმინდა თეკლას დედათა მონასტრის ეზოში, ღმრთისმშობლის ეკლესიის გვერდით, ავაშენეთ წმინდა ნიკოლოზის სახელობის მცირე ტაძარი, რომელიც X საუკუნეში აგებული მარტვილის ჩიქვანების კარის ეკლესიის ასლია.



მონასტერში ცხოვრების წესი

წმინდა თეკლას სავანის მონასტრად ჩამოყალიბება 2007 წელს დასრულდა. უწმიდესი გაეცნო მონასტრის ყველა წევრს და მიეცათ ლოცვა-კურთხევა მონაზვნად აღკვეცისთვის. მონასტრის წევრებმა უწმიდესის წინაშე იღუმენიობის კანდიდატად ერთხმად წარადგინეს მათი წინამძღვარი, მონაზონი თეკლა. კათოლიკოს -პატრიარქმა იგი იღუმენიად დაამტკიცა და აკურთხა წმიდა სამების საკათედრო ტაძარში. დღეისთვის მონასტერში ცხოვრობს 11 მონაზონი და 6 მორჩილი, მონასტერი ცხოვრობს ზოგადცხოვრებულთა (კინოვიური) წესით. მონასტრის ცხოვრების ხერხემალი არის ერთობის სული, რომელსაც საფუძვლად უდევს ძმათმოყვარება, ურთიერთპატივისცემა, ერთმანეთის სიმძიმის ტვირთვა. მონასტრის წევრები ერთი სხეულის ნაწილები არიან და ამიტომ ერთნაირად პატივსაცემი და საჭიროა მონასტრის ყოველი წევრი. აქ არ არის ხელმძღვანელისა და ქვეშევრდომის დიექტორული დამოკიდებულება. მონასტრული ცხოვრება ხელმძღვანელობს სახარებისეული სულით: "ვის უნდეს თქუენგანსა პირველ-ყოფაჲ, იყოს იგი ყოველთა მრწემ და ყოველთა მსახურ" (მრკ. 9, 35), ანუ ვისაც პირველობა უნდა, ის, წმინდა პავლე მოციქულის მსგავსად, თავს უნდა თვლიდეს ყველაზე უმცროსად და ყველას მსახურად. თვით მონასტრის იღუმენიაც მონასტერს განაგებს მონასტრის წესდების საფუძველზე. მისი ნება განუყოფელია კრებულის ნებისაგან. იგი ყოველივეს წყვეტს და განაგებს მონასტრის უპირატესი წევრების რჩევითა და თანხმობით. ზოგადცხოვრებულთა მონაზვნები მონასტერში მოძღვრის საწვლებითა და ხელმძღვანელობით ბაძავენ თვით ქრისტეს, რომელმაც ჩამოაყალიბა მწყობრი მოწაფეთა - მოციქულთა და ყველაფერი და თვით საკუთარი თავიც გადასცა მათ მსახურებისთვის.