ათონზე, პანტოკრატორის სავანეში, დაბრძანებულია სასწაულთმოქმედი ხატი ჰერონტისა.
ერთ ღვთისმოსავ ბერს, ამ სავანის იღუმენს, სიკვდილის დღე წინასწარ ეუწყა და რაკი სურდა, გარდაცვალებამდე წმინდა ზიარების მიღება მოესწრო, მორიგე მღვდელს სთხოვა, ლიტურგია დაეჩქარებინა, მაგრამ მან ყურად არ იღო. მაშინ სასწაულთმოქმედი ხატიდან, რომელიც საკურთხეველში იდგა, მრისხანე ხმა მოისმა, რომელიც ღვთისმსახურს უბრძანებდა, იღუმენის სურვილი აღესრულებინა. მეორედ კი ამ ხატის წინაშე იღუმენის ლოცვის შემდეგ მონასტრის ცარიელ ჭურჭლებში ზეთი განსაცვიფრებლად გამრავლდა.
დედა ღვთისა მთელი სიმაღლით არის გამოსახული. ხატი შემოსილია ვერცხლის პერანგით, რომელზეც მის მიერ აღსრულებული სასწაულის მოსახსენიებლად ზეთის ჭურჭელია დამაგრებული.
