წმინდა ნეოფიტე კვიპრელი, დაყუდებული - 24 (06.02) იანვარი
წმინდა ნეოფიტე კვიპრელი, დაყუდებული - 24 (06.02) იანვარი
ნეოფიტე დაიბადა 1134 წელს კვიპროსში. ბავშვობიდან ქალწულების აღთქმის დადება და მონაზვნური ცხოვრება სურდა. ცოლი რომ არ შეერთო, თვრამეტი წლისა შინიდან გაიქცა და წმინდა იოანე ოქროპირის სახელობის მონასტერში დასახლდა. მშობლებმა მალევე მიაგნეს და შინ დააბრუნეს.

მათ ნეოფიტესათვის საცოლეც შერჩეული ჰყავდათ და ძალით დააქორწინეს კიდეც. ქორწინების ღამეს მეორედ დატოვა მშობლების სახლი და მონასტერში წავიდა, სადაც სასწრაფოდ აღიკვეცა ბერად.

ნეოფიტე მონასტერში ხუთი წელი ვენახს უვლიდა, ისწავლა ფსალმუნების და წმინდა წერილის კითხვა. ნეოფიტეს განმარტოებით სურდა დაყუდება, მაგრამ მონასტრის წინამძღვარი უფლებას არ აძლევდა. მაშინ ნეოფიტემ დატოვა მონასტერი და წმინდა მიწაზე წავიდა იმ იმედით, რომ სამოღვაწეოდ შესაფერის ადგილს იპოვნიდა. ეს არ იყო ღვთის ნება, ამიტომ მონასტერში დაბრუნდა.

ხუთი წელი მუშაობდა მონასტრის ვენახში. თან გატაცებით სწავლობდა წმინდა წერილს. შემდეგ წმინდა მიწაზე წავიდა, მაგრამ ეს არ იყო ღვთის ნება და დაბრუნდა თავის მონასტერში. მეორედაც დატოვა სავანე, ამჯერადაც ქვეყნის გარეთ აპირებდა მოსაგრეობისათვის შესაფერისი ადგილის ძებნას. შეიპყრეს და უმიზეზოდ დააპატიმრეს. ამ მოვლენაში ნეოფიტემ უფლის გაფრთხილება დაინახა, იფიქრა, ეტყობა, ღმერთს არ უნდა სამშობლოდან რომ წავიდეო. გათავისუფლების შემდეგ ნეოფიტემ ციცაბო მთაზე გამოქვაბული იპოვა და იქ დაიწყო მოსაგრეობა. ამ დროს იგი 25 წლის გახლდათ.

მარტო ყოფნა არც აქ გამოუვიდა, მრავალმა ბერმა დაიწყო მის გარშემო მოღვაწეობა, ააშენეს ეკლესია. ასე დააარსა ნეოფიტემ ახალი მამათა მონასტერი, რომელსაც კარიბჭე უწოდა. საძმო მრავლდებოდა. ნეოფიტემ მოშორებით იპოვა პატარა მღვიმე და იქ გადავიდა. ერმა ამ მღვიმეს ახალი სიონი უწოდა. ამის შემდეგ ბერი მღვიმეს მხოლოდ კვირაობით ტოვებდა, რათა თავის მონასტერში ჩასულიყო და ღვთისმსახურებაში მიეღო მონაწილეობა. ნეოფიტემ დაგვიტოვა ასკეტური და ჰომილეტიკური თხზულებები.

ხატის წყარო
ბეჭდვა
1კ1