ნაუმ ოჰრიდელი (ასევე ცნობილია, როგორც ნაუმ პრესლაველი; 830-იანი წლები — 23 დეკემბერი 910, ოჰრიდი) — ბულგარელი წმინდანი. განსაკუთრებულ პატივს მიაგებენ ბულგარეთსა და მაკედონიაში.
წმინდა ნაუმი კირილე და მეთოდესა და კლიმენტ ოჰრიდელთან ერთად ითვლება ბულგარული რელიგიურილი¬ტერატურის დამფუძნებლად. ნაუმი იყო კირილესა და მეთოდეს ერთ-ერთი მოწაფე. პირველი სლავური ლიტერატურული სკოლის დაარსება მოხდა 886 წელს ბორის I-ის ბრძანებით, რომელიც შეხვდა კირილესა და მეთოდეს სამ მოსწავლეს ნაუმს, კლიმენტსა და ანგელარიას, რომლებიც დევნილები იყვნენ გერმანელი კათოლიკე სასულიერო პირებისაგან, რადგან სლავური წარმოშობის მოსახლეობაში სლავურ ენაზე ქადაგებდნენ. მეთოდეს მოწაფეებს, მათ შორის ნაუმსაც ბულგარეთში სიხარულით შეეგებნენ. სამეფო კარსა და დიდებულთა სახლებში მათ, როგორც საყვარელ მოძღვრებს, ისე ხვდებოდნენ და მათივე ხელმძღვანელობით ეუფლებოდნენ სლავურ დამწერლობას. ბულგარეთში დაარსდა შვიდი საკათედრო ტაძარი საეპისკოპოსო კათედრებით; მოეწყო მრავალი სასწავლებელი. მეთოდეს მოწაფეები: კლიმენტი, ნაუმი, ანგელარიოსი, საბა, გორაზდი დაუღალავად მიმოდიოდნენ ბულგარეთის ქალაქებსა და დაბებში, მოძღვრავდნენ ახალმოქცეულებს, თარგმნიდნენ ბერძნულ წიგნებს სლავურად. ბულგარეთი მათ მადლიერებით იხსენიებს და თავიანთ პირველმასწავლებლებთან ერთად განადიდებს საერთო სახელით "შვიდი მამა".
ბულგარეთში განათლებამ განსაკუთრებულ სიმაღლეს მიაღწია ბორისის უმცროსი ვაჟის, სიმეონის (888-927 წწ.) დროს. მან კონსტანტინოპოლში მიიღო ბრწყინვალე განათლება, რისთვისაც ისტორიკოსები "ნახევრად ბერძენს" უწოდებენ; იგი უდიდეს ყურადღებას აქცევდა ქვეყანაში სარწმუნოებისა და ცოდნის დამკვიდრებას. სიმეონმა დიდებით იმეფა, გააფართოვა სახელმწიფოს საზღვრები. მისი მეფობის პერიოდი ბულგარული დამწერლობის ოქროს ხანად ითვლება. სიმეონს ახარებდა წმინდა მამათა გარჯა ბულგარეთში განათლების გასავრცელებლად და ყოველმხრივ მფარველობდა მათ. თავადაც მონაწილეობდა იოანე ოქროპირის თხზულებებისა და სხვა წიგნების თარგმნაში. 893 წელს სიმეონ I-მა პირველი სლავური ლიტერატურული სკოლა გადაიტანა ბულგარეთის ახალ დედაქალაქ პრესლავში. ამავე წლიდან ლიტერატურულ სკოლას წმინდა ნაუმი ხელმძღვანელობდა.
წმინდა ნაუმმა 905 წელს ბულგარეთის სამხრეთ-დასავლეთ მხარეში, ოჰრიდის ოლქში, დააარსა მონასტერი ოჰრიდის ტბის ნაპირზე, რომელიც დღეს მისი სახელობისაა. აქვეა დაკრძალული მისი სხეული.
.......................
აქვე ნახეთ:
მოციქულთასწორი წმინდა ნაუმ ოქრიდელი (+910) - 20 ივნისი (3 ივლისი)
